Umbau Etappe 1

Höchsti Ziit zum eu mol zeigä, dass i nid eifach untätig gsi bi i dä letschtä Wuche, sondern schlicht kei Ziit gha ha zum fötälä und postä.

Wie i eu scho verrotä han, bin i dra, mir näbä schaffä und Ufträg uszfüehrä ä richtigi Werkstatt izrichtä. Uf dä Wäg zu mim eignä Büdäli wöt i eu ab hüt mit äs paar Posts chli mitnäh und mini Freud mit eu teilä…

15. November 2025: mini guetä Kollegä Zoe und Andres vo dä Spenglerei Sturzenegger händ mi agfrogät, ob i mir chönnt vorstelle, as Untermieter i sini neu Gwerbhällä in Wängi z zieh. I ha nid lang brucht zum mi mit dem Gedankä afründä. Mis eignä Büdäli, kei logistisches Puff meh zwüsche Garage und Wintergartä - Ziitpunkt wege Wiehnachtsmärkt nid optimal, aber geil! Ä chlises Träumli wird wohr...

25. November 2025: bevor mir hend chönä richtig loslege, het die ganz Hallä zerst mohl müesse abägwäsche und mit neuer Farb a Decki und Wänd verseh werde. Au nachher no keis Schmuckstück, aber ä gueti Basis zum öppis richtig Tolls chönä drus mache.

Scho churz drufabe isch d Ufteilig gstandä und d Grüst für ersti Wänd sind gstellt gsi. D Ideä für mis chlinä Riich sind nur so gsprudlät und i has chum chönä erwartä so richtig loszlegä...

Umbau Etappe 2

Am liäbstä het i mi nu no i die Hallä verchrochä und mis Büdäli entstoh lo. Aber schaffä han i jo au no müessä und dä Wiehnachtsmarkt in Stettfurt isch agstandä.

Jedi frei Minutä han i gnutzt, zum Wänd stellä, än Bodä zlege und mini 100m2 chli schlau izteilä. Zweckmässig und zum Wohl fühlä söll mis Büdäli si. Drum han i mit tatchräftiger Unterstützung ganz viel Holz verbaut i mim Riich.

11. Dezember 2025: endlich händ mir no Zugang becho zum muetmasslich chlinä Bäsächammerä-Büro. Und siehe da, äs isch än grosszügigä Ruum fürecho, wo sich für mi perfekt as Laser-Zimmer eignät. Nomol umdenkä, Ruum neu gstaltä, ideali Ufteilig findä… Und natürli schnellstmöglich di grüen Farb verschwindä lo - da grifft au dä Zimmermaa gärn zu Pinsel und Rollä…

13. Dezember 2025: Durchbruch vo mim Werkstattbereich zum Laserzimmer. Somit isch s Grundgrüst definitiv gstandä. Dä Innäusbau hät so richtig chönä losgo und di erstä Maschinä händ chönä izieh. Vollgas ohne Ende, dä Wiehnachtsmarkt Frauenfeld hät jo au no müesse vorbereitet werdä… 

Umbau Etappe 3

Gad no motivierter und mit chli weniger Druck han i nacheme sehr erfreulichä Wiehnachtsmarkt Frauenfeld über d Festtäg mini ganz Ziit und Energie chönä i mis Büdäli stecke. Guet, dank eu han i au no ganz än Huufä Ufträg dörfä usfüehrä über die Täg. Aber glich: s isch so richtig öppis gangä! Eifach extrem geil, ihr chönd eu fast nid vorstellä was i immer für ä Freud gha ha wänn wieder öppis gschafft gsi isch. Ersti cooli Möbel, Maschinä und Werkzüüg händs immer meh nach MIM Büdäli usgseh loh.

Bitz zrugghebä han i aber no müesse, ein ganz grossä Schritt im Umbau isch no bevorgstandä.

13. Januar 2026: alli altä Fenster händ müesse usä, neui sind ibaut wordä. Wältä säg i eu. Nid nu energetisch, sondern au optisch.

Somit isch gueti 8 Wuchä, nachdem i s erst Mol so richtig konkret über mini eigni Budä nadenkt ha, s gröbsti erledigät gsi. D Werkstatt isch scho zimli wiit gsi, endli han i mi au chönä am irichtä vom Laserzimmer widmä.

18. Januar 2026: mini Laser und Zuebehör sind umzogä. Au wänn nonid alles fertig isch und s no viel z tue git än wiiterä Meilästei.

Ab sofort graviert, drechslät und handwerkät dä GravurChlütteri nüme im Wintergartä, sondern im eignä Büdäli. Wiä geil isch das dänn?! MEEEEGA GEIL!!!

No isch mis Büdäli nid offiziell eröffnet, wo genau und wänn ihr mi künftig da werded aträffä folgt no. Wiä versprochä dörfäd ihr aber än erstä Blick i mis Büdäli werfä. Äs isch wiä gseit nonid alles ganz fertig und gad alles zeigä wöt i eu au nid - s wird scho gli ä Iladig zum Tag vo dä offnä Tür folgä und s söll sich jo für eu no lohnä zum dänn cho.

Äs paar Idrück möcht i eu aber glich scho gä. I han u huere Freud und da wöt i au teilä. Genau wie äs riiiiesigs DANKESCHÖN a alli, wo mi mit Rat und Tat oder dur ihri Ufträg bi dä Erfüllig vo mim Büdäli-Traum unterstützt händ.

Viel meh däzue z sägä gits eigentli nid - lueged sälber…